ಬಿಳಿ ಕೂದಲು

ಕಾರ್ಮೋಡಗಳ ನಡುವೆ ಮಿಂಚೊಂದು ಹರಿದಂತೆ

ಬಿಳಿಯ ಕೂದಲೊಂದು ಎದ್ದು ಕಾಣುತಿದೆ

ಜೀವನದ ಮಧುರವಾದ ಘಟ್ಟವು ಮುಗಿಯಿತೆಂದು

ಕಾಲವು ತನ್ನದೇ ರೀತಿಯಲ್ಲಿ ಸೂಚಿಸುತಿದೆ

ನನ್ನ ಮನಸನ್ನೇ ಪ್ರತಿಬಿಂಭಿಸುತ್ತಿದ್ದ ಕನ್ನಡಿಯು

ಇಂದು ಸತ್ಯವ ತೆರೆದಿಡಲು ನಿರ್ಧರಿಸಿದೆ

ಮುಂದೊಂದು ದಿನ ಹೀಗಾಗುವುದೆಂದು ತಿಳಿದಿದ್ದರೂ

ಅದನ್ನು ಇಂದೇ ಅರಿಯಲು ಕಸಿವಿಸಿಯಾಗಿದೆ

ಇದುವರೆಗೂ ಚೆಂದವಾಗಿ ಕಂಡಂತ ಮೊಗದಲ್ಲಿ

ಇದ್ದಕ್ಕಿದ್ದಂತೆ ನೆರಿಗೆಗಳು ಎದ್ದು ಕಾಣುತಿವೆ

ಮನಸ್ಸಿನ ಕಣ್ಣಿಗೆ ಅಂಟಿದ್ದ ಪೊರೆಯನ್ನು

ಬಿಳಿಯ ಕೂದಲೆಳೆಯೊಂದು ಕಿತ್ತುಹಾಕಿದೆ

ಕನ್ನಡಿಯನ್ನೇ ಧಿಟ್ಟಿಸುತ್ತಾ ವಯಸ್ಸನ್ನು ಲೆಕ್ಕ ಹಾಕಿದೆ

ಇಷ್ಟು ಬೇಗನೇಕೆ ಬಿಳಿಕೂದಲೆಂದು ಯೋಚಿಸಿದೆ

ಮಕ್ಕಳಾದರೂ ಮದುಮಗನಂತೆ ಇದ್ದ ನನಗೆ

ಯಕಶ್ಚಿತ್ ಕೂದಲೊಂದು ವಯಸ್ಸಾಯಿತೆಂದು ಕೂಗಿ ಹೇಳಿದೆ

ಕತ್ತರಿಸಿ ಪ್ರಯೋಜನವಿಲ್ಲ, ಮತ್ತಷ್ಟು ಹುಟ್ಟುವುದು

ಬಣ್ಣ ಹಚ್ಚಿ ಕಪ್ಪಾಗಿಸಬಹುದು, ಆದರೆ ಶಾಶ್ವತವಲ್ಲ..

ಕಾಲಕ್ಕೆ ಎದುರಾಗಿ, ಇನ್ನೂ ಯೌವನದಲ್ಲಿರುವ ಮನಸ್ಸು

ಈ ಕೂದಲುಗಳನ್ನೇಕೆ ಕಾಲದ ವಶದಿಂದ ಉಳಿಸಲಿಲ್ಲ?